مش لازم تبقي تمام كل يوم
هدنة نفسية صغيرة علشان نفسك
في أيام بنصحى فيها تقال.
مش عارفين ليه، ولا عايزين نشرح، ولا عندنا طاقة نمثل إننا كويسين.
والحقيقة ... إن ده طبيعي.
مش كل يوم لازم نكون أقوياء، أو ناجحين، أو مبتسمين ولا منجزين.
أحيانًا كل اللي محتاجينه … هدنة.
يعني إيه هدنة نفسية؟
هدنة نفسية يعني: توقفي شوية.
تبطّلي تجري.
وتسمحي لنفسك تحسي … من غير ما تحاسبيها.
هي مش خطة معقدة، ولا كلام كبير.
دي عادات بسيطة جدًا، نعملها بهدوء، يوم ورا يوم.
10 أيام نقرّب فيها من نفسنا
1️⃣ اسألي نفسك بصدق
متقوليش “أنا كويسة؟”
لكن أسألي: أنا حاسة بإيه دلوقتي؟ حتى لو الإجابة: “مش عارفة”.
2️⃣ خفّي الكلام القاسي
خلي بالك من كلامك مع نفسك.
لو ما ينفعش تقوليه لحد بتحبيه … يبقى ما تقولهوش لنفسك.أعتقد مفيش حد هتحبيه أكتر من نفسك.
3️⃣ بطّلي مقارنة
أي مقارنة تيجي في بالك النهارده،
قولي: دي مش رحلتي، أنا مش عايزا نفس الحياة، ولا دا طريقي ولا دي نفس ظروفي.
4️⃣ اعملي حاجة بتحبيها
حاجة صغيرة، ليكي إنتِ.
مش علشان حد، ولا علشان صورة ... عشانك إنتي.
5️⃣ اكتبي اللي مضايقك
مش لازم يكون مرتب.بس المهم إنك تطَلّعيه من جواكي.
6️⃣ اهتمي بجسمك
أكلة كويسة، شاور دافي، شوية نوم.
مش علشان شكلك… علشان قلبك.
7️⃣ قولي “لا”
مرة واحدة بس.
حتى لو بصوت واطي.
8️⃣ رتّبي مساحة صغيرة
سريرك، شنطتك، درج.الهدوء أحيانًا يبدأ من برا.
9️⃣ رسالة لنفسك
اكتبي لنفسك كلام حلو.حتى لو أول مرة.
🔟 اختاري حاجة تكمّليها
لو في عادة واحدة حسّيتي إنها ريّحتك.كمّلي عليها براحتك.
كلمة أخيرة
إنتِ مش متأخرة.
ولا ضعيفة.
ولا مطالبة تبقي تمام طول الوقت.
إنتِ إنسانة … وده كفاية.
بقلم: بسمله دهب "𝓑𝓜𝓓" – كوتش نفسي ومرشد شخصي 💜
حابّة أسمع رأيكم وتجاربكم…
إيه عادة نفسية حسّيتوا إنها فرقت معاكم؟ شاركونا في الكومنتات 🌿
تقدري تتواصلي معايا على السوشيال ميديا بتاعتي:
🌸 انستجرام: [https://www.instagram.com/basmalh.m.dahab?igsh=Nm9lcHMwb2F6cm9i]
🌸 فيسبوك: [https://www.facebook.com/share/1FhxsghCyv/]
تعليقات
إرسال تعليق